Ulttyq ekonomıka birinshi vıse-mınıstri Rýslan Dálenov QR Úkimetiniń baspasóz ortalyǵynda ótken brıfıngte XI Astana ekonomıkalyq forýmynyń jańa formaty, talqylaýǵa usynylatyn máseleler men taqyryptar týraly aıtyp berdi, dep habarlaıdy primeminister.kz.
Rýslan Dálenovtyń aıtýynsha, jańa format úsh blokqa bólinedi: iskerlik baǵdarlama, strategııalyq sessııa jáne zertteý. Forým is-sharalarynyń tujyrymdamasy ınteraktıvti sharalar arqyly keńeıtiletin bolady. Forýmnyń barlyq alańdarynda jańa zamanaýı mýltımedııalyq sheshimder qoldanylady: TED talks, vızıonerlerdiń baıandamalary, ınnovasııalyq prezentasııalar, kópshilik aldyndaǵy suhbat, arnaıy vorkshoptar jáne t.b.
Budan ózge, saraptamalyq pikirtalastyń joǵary deńgeıi belgilenedi. Forýmǵa álemdik zııatkerlik elıta, álemdik korporasııalardyń basshylary, ǵalamdyq startapshylar, tanymal fýtýrologtar, sheteldik jáne otandyq saıasatkerler, bedeldi ekonomıster men ǵalymdar, Nobel syılyǵynyń laýreattary shaqyryldy.
«Astana ekonomıkalyq forýmy álemdik ıntellektýaldy arenada Qazaqstandy halyqaralyq jaıǵastyrýdyń jańa júıesiniń qozǵaltqyshtarynyń biri sanalady. Forýmnyń arqasynda el brendi ǵalamdyq sarapshylar jelisi arqyly damyp keledi», dedi Rýslan Dálenov.
Sonymen birge, AEF tujyrymdamalyq álemdik ıdeıalardy talqylaýdyń dıalogtyq alańyna aınalýda. Pikirlermen jáne sońǵy ǵylymı-praktıkalyq jetistiktermen almasý álem men Qazaqstan úshin tıimdi sheshimder men tájirıbelik usynystardy ázirleýge múmkindik beredi. Sondaı-aq, jahandyq ınvestorlardyń qyzyǵýshylyǵy da arta túspek. Ulttyq ekonomıkanyń birinshi vıse-mınıstriniń aıtýynsha, forým sheteldik ınvestorlardy tartatyn magnıt sekildi, Qazaqstannyń jáne álemniń jetekshi bıznesmenderi kezdesetin oryn.
«AEF ekonomıkalyq ǵylym boıynsha álemniń eń úzdik ǵalymdary men sarapshylarynyń, Nobel syılyǵy laýreattarynyń bas qosatyn alańyna aınaldy, munda jas qazaqstandyq ekonomıster qundy bilim men tájirıbe alady», dep túıindedi R. Dálenov.
Budan ózge, ulttyq ekonomıka birinshi vıse-mınıstri forýmda memleketter, qalalar men kompanııalar arasynda birqatar mańyzdy kelisimderge qol qoıý josparlanǵanyn atap ótti.